اللفه
بنيجي الدنيا في لفه
ونخرج منها في لفه
وبين اللفه و اللفه
بنشوف اهوال
بنشوف حكايات
وكتير روايات
في ناس الدنيا رضياها
لكن جواها مش راضيه
قلوب تعبانه وفاضيه
يادوب مشغوله بالملايين
ودول وخداهم الدنيا
لكن جواهم ناس مساكين
اصل السعاده راحة بال
صدقوني مش ملايين
وناس الدنيا طحناها
وظلم الدنيا بكاها
وفي الأخر يادوب فتافيت
لكن مرتاحه من جوه
وربك والله رب قلوب
وناس تانيه بين البينين
مابين راضيه ومش راضيه
وتتلون كما التعابين
وناس مش راضيه بحياتها
وكمان كافره بالمقسوم
صباح ومساء تلاقيه مهموم
وناس المولي راضيها
ومن الخاشيه تبكيها
ودول حامدين الله وشاكرين
صباح ومساء من الساجدين
صباح الرضي دايما
علي وشوشهم وبسمتهم
سر السعاده للناظرين
شمال ويمين
السعاده في رضي ربك
ولا مال ولا طين
ويارب اجعلني بوجهك
الكريم من الناظرين
اللهم امين
بقلم
احمد محمود
من ديوان حبة رتوش
ليست هناك تعليقات:
إرسال تعليق