الفتونة جدعنة
والحنان هو المرجلة
والتسامح طيبة أصل
والصدق تربية
والوفا تربية
والعلم جو الفصل
وبره الفصل
وأمانة السر تربية
وأكل الحلال تربية
والإعتراف بالفضل
هو الفضل
وحفظ الشرف دين
وحفظ الوطن دين
واللي يخونهم ندل
وخاين عديم الأصل
إتعلمنا من الدنيا ياما
دروس قاسية جرحتنا
تركت فينا 100 علامة
واللي ماتعلمش منها
راسب فيها خايب
قاعد في أخر الفصل
واللي سابنا وقت شده
واللي بعنا سيبنا من ده
جاي بضحكة صفرا النهاردة
قل له المواقف فصل
معتش ينفع الكلام
وبإيه يفيد بس الملام
ولا عهد ينفع ويا اليئام
ولا عديم الأصل
إتعلمنا جبر الخواطر
نجتنا ياما من المخاطر
واللي عامل فيها شاطر
واللي فاكر فيها مالك
يشوف اللي قابله في المهالك
واللي غره سلطانه ذله
واللي غره ماله قله
واللي عقله سهاهه وقال له
إنه قادر فيها ضله
هي حفره مش بعيدة
فيها نايم اللي قبله
الحكايه إني بنصح
اللي عامل هو المفتح
من تراب وماء خلقنا
ليه نزود من شيلتنا
أحسن نعود للأصل
والحكم يوم الفصل
سيدحجازي
ليست هناك تعليقات:
إرسال تعليق