لو زهزهت لك الدنيا
خاف منها
اصل اخرتها غير أولها
اه يادنيا بميت وش
اه يادنيا غش في غش
اه يا دنيا قلابه
اه يا دنيا غداره
عماله فينا تدوس
يا مكن من غير تروس
لا بتهدي ولا بتتعبش
كان فيكي ناس ولاد ناس
جار عليهم الزمن وداس
نزل من مراتبها
وعديم الأصل بماله ناسبها
وناس الفقر راكبها
انكسر شراع مراكبها
وشايله من الهموم بالكوم
و بتقول يا حيطه داريني
وناس بتقول للقبر خبيني
وناس عيشتها حرام في حرام
وناس الظلم عنوانها
عايشه. بس. ايامها
ونسيت دعوة المظلوم
ولابد من يوم معلوم
تترد فيه من الظالم
وناس عايشه ومتهنيه
راضيه ربها ومرضيه
وعارفه أن اخرتها غير أولها
ولو زهزهت لك الدنيا
خاف منها
اصل اخرتها غير أولها
بقلم
احمد محمود
من ديوان حبة رتوش
ليست هناك تعليقات:
إرسال تعليق