كان واحد شبهي
الشاعر / رضا البوشى
باصرخ مش خوف م الليام
ما هي ذبذبات دايرة
وسواد بيشد بعض
لكن باخاف
من صمت المشاعر
ومن ضحك البشر ع الأرض
مع إن عيونك
اوسع م البحر الهادي
لكن نظراتك تشبهني
مع إنك أطول مني بشبرين
وعيونك زي عيوني البني
نفس الضحكة الطفولية
جواها
ضحكة جني
نفس المشية المكسورة
فوق الحلم المحني
شيبة وشك مش عاجبة الخلق
لكن تعجبني
شعرك مليان أحزان
تصنع بركان
مع إنك سنك من سني
قلبك واسع كان قد البحر
وإتغير بكرة
بقى قد النني
هو إنت مين يا جدع؟
ياأبو ضحكة بتهز الوجع
وسجنت نفسك جوه بير
وركبت خطاوي الزمن
وبتسبق العصافير
جوة قفص الحياة
لا أنا كنت أعمى ولا بصير
ولا يوم كنت أبو زيد الهلالي
ولاحتى ضله في الأساطير
خليني مرة أحضنك
مرة المسك
وأرسم قصور الصبر على كفك
واكون مملوك في مملكتك
زي الغلابة
انام افضفضلك
تفتح خيالك
في الضلمة تحضني
أنا قلبي زي الشجر
يعصر فروعه ويدي
ويموت على الهادي
مع إن عيونك أوسع
من البحر الهادي
لكن تشبهني
ليست هناك تعليقات:
إرسال تعليق