عاتبتك بصرخة آلم.....رديتي بنار الغدر.
علمتك كيف الرحمة....كحلتي عيوني دم.
إحترت أنا في أمرك...بتلومي ليه على الآه.
وتدوسي ليه على الجرح.
مش كنت يوم إبنك ...ودمي لون خدك...
مين علمك تآسي...وتزيدي في الغدر.
لو كرهي كان دينك...وسيفك غلب زمني...
وموتي على بابك....ماتمسحيش الدم.
دا المسك من دمي والغنوه دي صوتي....
في حياتي أو موتي مهما سرقتي الحلم.
دوسي كمان وكمان..دا معتش بنا ود.
وإستعجلي موتي ومترحميش دمعي..
خلي الجبل يتهد.
ولو شوفتي يوم خوفي قومي إفتحيلي القبر.
ومتشغليش بالك .........مهما يطول ليلك...
دا الليل بيولد فجر
كان فيها إيه لو ترحمني يوم وتأجلي الجرح
زعلان قوي منك............مليت أنا غدرك..
ومعتش ليكي عذر
سنين وأنا صابر..والصبر ذي الموت....
سارق عيون الفجر
أنا راح خلاص صوتي..أنا إشتريت كفني..
يوم ما سرقتي الحلم
بدلتي حال عن حال....ورفعتي ناس فوق ناس
وسقيتي ولد الأصول المر.
وأخرتها يا دنيا واقف على بابك...رحال بلا زواد
مطرود من الأرحام...جثة وكفانها الحزن.
متقولي ساكتة ليه...مش إحنا ولاد الجود...
ولا إحنا ورثنا الذل.
على فين وخداني يا دنيا....بتسرقي حلمي..
وبتجلدي ليلي....وتحملني الذنب.
خليتي شهدي مر أحزان ورا أحزان
وتقولي غدار وخان العهد.
أشكي لمين أسوتك والغدر فيكي طبع
دا جرحي يوم لو طاب...في إيدك ألف جرح
ولو فرحي داس حزنك....أو شهدي خان مرك
أنا قريب منك جارك هنا في القبر
أنا إشتريت موتي وماشي وسيبهالك
وإسألي روحك مين فينا ...خان العهد.
شوفي جريح غيري دمه من دمك...
يرضى بهوان غدرك ..يمكن يبيع الحلم.
أحمد طلبه.
ليست هناك تعليقات:
إرسال تعليق