(( الله يسامحك))
لما أنت ناوي ع الرحيل
سايبني ليه أجري وراك
لما قلبك ساكنه غيري
ليه بتوهمني بهواك
جرحي نازف وانت شايف
ليه معشمني فى دواك
ليه بعيش مستني بكرة
عشان فى بكرة أكون معاك
كاس حنانك فاض لغيري
ليه ترغمني أشرب جفاك
كنت قولي م البدايه
ولا ناوي ع الهلاك
كنت فى دنيايا جنة
بالعيون شايفك ملاك
دا الوسادة من دموعي
ما أشتكت للشوق سواك
حتى نجمة وعدني بيها
بطلت تحضر مساك
عشت مخدوع وصابتني غيره
بغير عليك من عود سواك
شهرت سيفى للجماد
سمحته بس لما قالوا دا عود آراك
الله يسامحه نبض قلبي
هو اللي بعينه رآك
خلاص يا سيدي بطلنا نحلم
أصل المنام طاله قساك
كأس الحقيقة طعمة مر
بس أطعم من خداع عايشه معاك
ذنبه ايه قلبي اللي حبك
تقتله وينول جزاك
هو انت لما تدفنه
كدا خلاص نولت مناك
ما شفعتش ليه عندك دموعي
والآهات عاصيه العقول عشان رضاك
الله يسامحك وعشمي
بكرة فى الزمن
انسى الهوى وانسى غلاك
بقلمي
نور الدين محمد
٢/١١/٢٠٢٣
ليست هناك تعليقات:
إرسال تعليق