نهايات كِتير ممكن بتجرح
لٓكنّها بتصبح مُفيدة
نقفل كتاب أحسن ما نفتح
من تاني صفحة في يوم جديدة
فيه حاجات كِتير ياما عِشنا بيها
وتِعبنا واللهِ بصراحة
فيه حالات كِتير البتر فيها
بيبقى أحسن م الجراحة
يعني خلاص مابقاش أمل
ولا يجوز ولا مُحتَمل
والماضي أهو كتاب إتقفل
ووصلنا للسكة البعيدة
نهايات كِتير ممكن بتجرح
لاكنّها بتصبح مُفيدة
أوقات كِتير البُعد أفضل
قبل أمّا يكبر الخِلاف
نِبعد أكيد قبل أمّا نوصل
للحظة من بعض نخاف
نبعد ونرحل من سُكات
وبكل حكمة وبتراضي
وبلاش نصّحي اللي مات
واللي خلاص بقى يعني ماضي
كام مرة قولنا بلاش دموع
وبلاش نعيد تاني الحكاية
وإن الطريق مالهوش رجوع
وخلاص وصلنا للنهاية
فيه حاجات أكيد لو تِنكِسر
م الصعب ترجع يعني تاني
حتى الرجوع بيسيب أثر
فياريت نفكّر لو ثواني
يعني خلاص مابقاش أمل
ولا يجوز ولا مُحتَمل
والماضي أهو كتاب إتقفل
ووصلنا للسكة البعيدة
نهايات كِتير ممكن بتجرح
لٓكنّها بتصبح مُفيدة
بقلمي عبدالحميد وهبه
ليست هناك تعليقات:
إرسال تعليق