شعر "سعيد حمدى محمد
★★★★★★
كل يوم همك ييجى على بيت جارى
وانا خايف لا يغلط ويفط على دارى
وعيشت مهموم والدمع جارى
لحد الجرح ما دبح الفرح
والفلاح زود مرارى
★★★★★
لما بات ليله سهران
يتفرج ويسقف للأحزان
وعياله اهى بصاله
وهو بيزرع جواهم افعاله
بفلم الساحر والشيطان
★★★★★★
علمهم حرت الارض وازاى تتخضر
علمهم ازاى نبنى ونعلى ونعمر
وبلاش تزرع جواهم الضياع
وتملا شقوق ارواحهم بالاوجاع
بكره تجنى ودمعك ع الخدود جارى
★★★★★★
ياما بدرت فيك حب العشم..خيب ومطلعشى
وبعتلك مرسال الامل . انقتل مرجعشي
معلهشي . انا مش هسيب تارى
انا هكسر باعك. وأدوقك اوجاعك
ورجعك لاصلك مادام عندى اصرارى
★★★★★★
اصلك عايش فى داومة الدش
لما توهك ببحر النفاق والغش
وخاصمت الغيط والبتاو والمش
ورحمة امك لا احضنك واضمك
واغربل منك العوج والمك
واربطك فى شغول الصارى
★★★★★★
واخدك امرمغك فى طين الريف
واسمعك موال بصوت الشواديف
والطشك بنسيم العصارى
واعشيك بطابيخ الكنون
واسقيك شاى الحلزون
على نار الحطب اللى قايده بنارى
★★★★★★
احضنك واضمك واهيم
واعصرك زى الغريم
لحد ماتنضح الحنين
لزمن الناس الطيبين
والمغرفه الخشب
عاشقه قحف العصيده من سنين
بقالهم زمان ع الفرن مستنيين
مبادئ تعود
همك يبقى من همى
وفرحى من فرح جارى
★★★★★★
شعر "سعيد حمدى محمد
13/1/2024
ليست هناك تعليقات:
إرسال تعليق