إبنك مجنون والله يا حاج
بقى كل شوية نشوفه بلون
بصراحة أكيد وإن جيت للحق
إبنك بالحب صبح مفتون
للبنت يبص ويشاغلها
ووراها لحد ما يشغلها
وإن حاولت يوم تهرب منه
في ثواني يلف ويقابلها
ويسبّل ليها ويتمسكِن
بكلام م الحلو المتحّسِن
ولا عمرُه يكّل في يوم ويمّل
ووراها لحد ما يتمكّن
لا قطع لسان كل من قالوا
ده أنا إبني مازال بِكر ونونو
عايش طول عمرُه بقى في حالُه
ماعِرفش الحب ولا جنونه
ماشي بيتدارى في قلب الحيط
كل اللي يشوفُه يقول ده عبيط
إزاي على إبني بتتجنّوا
وتقولوا بإنه غويط وحويط
وإزاي بتقولوا عليه مجنون
ولّا انتوا كلامكوا شكوك وظنون
ده إن صادفت يوم ولمس واحدة
وشُه بيتحوّل يجي 100 لون
إزاي بتشكك في كلامنا
معقول على إبنك نتجنّى
والله يا حاج إبنك قصة
وكلُه على إيدينا وقدامنا
ليه حقيقته ليك مش معروفة
أو صورته يا حاج مش مكشوفة
إبنك في الحب صبح أشهر
من أحمد عز وكازانوڤا
واللهِ يا خلق أنا هتجنن
أنا حاسُّه مازال لسه صُغنن
أتاريه بقى يعني بيتغيّر
وصبح في الكدب بيتفنن
في الحب خلاص بقى إسطورة
وبعقلي الواد لعب الكورة
وحقيقته خلاص ليا آهي بانت
وإتّضحت قدامي الصورة
بقلمي عبدالحميد وهبه
ليست هناك تعليقات:
إرسال تعليق