ثروتك ايه ياعم الفقير
معزه قايمة ونعجة نايمة
وفرختين وجوز حمير
اوصف لي زادك
ياعم الفقير
يوم لقمة ناشفة
يوم لقمة حاشفة
وساعات كتير بننام خفيف
اوصف لي نومتك
ياعم الفقير
يوم عل السطوح
ويوم في الطوالة
وساعات كتير تحت السرير
اصل العيال عددهم كتير
اوصف لي السعادة ياعم الفقير
السعد. وعد للموعودين
اصل السعادة لحد الفقير
بتجري منه ولفوق تطير
طلباتك ايه ياعم الفقير
فض مجالس ولا كلام امير
كلام امير
لا مش كتير
تعيشوني وتسعدوني
قد اللي عيشتة وانا فقير
ودا عليكم مش كتير
ماشي
قصر ملوكي مفروش حرير
الأكل لحمة وحمام مشوي
والقشطة بلدي والعسل الأبيض
جنب الفطير
والمال دا روزم
فوق الدولاب وتحت السرير
ماشي
وتجوزوني اربع حريم
وأم العيال ياعم الفقير
يمين تلاتة
ما تنام معايا علي الحرير
طب والعيال ياعم الفقير
هيونسوها ويحرسوها
انا أصلي حمش
وكمان بغير
نهق الحمار وكمان رفسني
لقيت نفسي في قلب
الطوالة جنب الحمير
انا كنت بحلم حلم جميل
يا ميت ندامة
طار الحمام
ويا الحريم ويا الفطير
حلم الفقير
بقلم
احمد محمود
من ديوان سكة العاشقين
ليست هناك تعليقات:
إرسال تعليق