؟؟عبد خلف حمادة
*****************
تعي لنبكي عالهوى اللي راح
وأديش كنا بالغرام مناح
و كيفاش طبنا،و سكرت الجراح
و شو ملوك كنا،و عليت الأرواح
و قهرنا حتى الليل
وكنا لعتمتو مصباح
وكيف الأمل عصفور
وإحنا جناح
تتذكري شو كنا سكرانين
والراح بالراح
و بذكر هذاك اليوم كنا سهرانين
عا رمال شط الهنا و موال الوفا صداح
و تغلغلو النسمات فينا
معطرين
فيهم عبير الفل و انفاس الأقاح
و ديتك تحت راسي
وراسي تحت ديتك
والنجوم عا وش السما طافين
وتعانق المنتور و التفاح
و عطرك طغا عالكل
و خدودك لجين
تبرق عا ضو القمر
و تجاكرو
ومن خجلتو ينزاح
و ما أدري كيف غفيت و غفيتي
ما كنا دريانين
فجأة تهب رياح
سودا مثل تنين
فزعتي وهربتي بعيد
ما كنتي تنمسكين
برق ورعد ورياح
أركض مثل مجنون
ما كنتي تلتفتين
و فجأة وصلتي كهف
جواتو فتي لوين
ولما وصلت للباب
تسكر برمشة عين
و ما كان فيه مفتاح
غير البرد والطين
غير الحزن والصياح
مو كنا غفيانين
وإيدينا متوسدين
مو كنا متفقين
نمشي لقدرنا اثنين
رحتي لحالك ليش
و تركتي هالمسكين
وتركتي هالمسكين
*****************
مع تحيات الشاعر والكاتب عبد خلف حمادة
ليست هناك تعليقات:
إرسال تعليق