عتريس سايق في الظلم
ولا عمرُه يوم هَيكِِّل
دَفن بإيدُه الحِلم
علشان شايفنا ضِل
لا في يوم هينصِف حد
ولا راح يغيث ملهوف
طول ما إحنا لسه بجد
عايشين في شئ م الخوف
هوّه شايفنا إيه .....؟
حبة عبيد حواليه
كرباجُه صار في إيديه
طايح خلاص في الكل
عتريس سايق في الظلم
ولا عمره يوم هَيكِِّل
طول ما إحنا لسه عبيد
ودهاشنة مش أكتر
من حقُه يعني أكيد
يظلم ويتجّبر
فاكر بقلبُه الجاحد
بإنه صاحب حق
عشانُه مالقاش واحد
قادر يقولّه لأ
طب مين هينصفنا
ده الخوف مكتّفنا
ولا عمرنا شُفنا
على إيده مره العدل
عتريس سايق في الظلم
ولا عمره يوم هَيكِِّل
عتريس خلاص طايح
بإيديه في خلق الله
على كيفه جاي رايح
ولا حاجه فارقة معاه
وإحنا مازلنا يا ناس
واقفين محلك سر
أكبر ما فينا إندّاس
والحر مبقاش حر
رافع كمان سيفُه
يدبح على كيفُه
سايق في تخرّيفُه
ما هو الميزان إختّل
عتريس سايق في الظلم
ولا عمره يوم هَيكِِّل
بقلمي عبدالحميد وهبه
ليست هناك تعليقات:
إرسال تعليق