عبد خلف حمَّادة
™™™™™™™™™™™™™™™
گالت شگدك ذووق،ومحلا كلامك
الله شگد فنان،يرحم عمامك
يا ريت آني وياك ما إلنا ثالث
واسمع لك من تگول شعرك العابث
و تكتب لي أحلى بيت وأحلى قصيدة
وتاخذ عيوني الثنين وكل شي تريده
شگد أحسد آني فيك أهلك برضهم
اتسمعهم الأشعار،وإش محلا حظهم
الله يا ابن الناس، إش رقة إحساسك
مره تگول إشعار مرات ناسِك
نِيال مِن تهواك،نِيال أمها
تغمرها بالإحساس بشعرك تضمها
بشويش هدي شوي واجد حلمتي
والله ماني هيچ،ولا هذا سِمْتِي
ويابه شگد منتوف،وهدومي باله
و عايش بليا مال تراني عاله
خُلْف الله عالويلاد،و مشكوره أمهم
المثلي ما زتُّوه،طيَّح سعدهم
الشعر جاب الشك والغيره تُبرم
ولو أحلف آني بويس،تراني مجرم
يا زينة الزينات الشعر مو مقياس
يبووه شگد كحيان وطامس بالفلاس
ما عندي شي بنوب الله وكيلچ
لا يغشچ البرواز،يا بنية حيلچ
إحنا بزمن الابداع ما يسوى فجله
من ثگل همي عاد بيه اتسلى
وأنوب گلتي الحب،تعطي الحواليك
أكلچ آني سر،گولي لي شبيك
لو طاح شيب الراس،وما ضل بعد هِمَّه
إن غنيت مثل الياس،تراك رِمَّه
ثنتين عز الرجال،مابي سواهن
هِن الشباب ومال،خرده بلاهن
™™™™™™™™™™™™™™™
مع تحيات الشاعر والكاتب عبد خلف حمَّادة
ليست هناك تعليقات:
إرسال تعليق