إوعاك تفكّر يعني أو تحلم في يوم
إن الكلام الحلو ده ممكن يدوم
إنت في حياتهم شخص عادي ليس إلّا
كُمبارس بس بيحتاجوه وقت اللزوم
إوعاك تفكّر يعني ولّا الوهم ياخدك
إنهم في يوم ممكن يعانوا ساعات لبُعدك
بالنسبة ليهم إنت حاجة ماتتذكرش
هتمشي يعني وييجي ألف شخص بعدك
إوعاك في مرة تزعل م اللي بيعملوه
رسموا طريقهم اللي بيك بيكمّلوه
حتى القمر بيك حاولوا يعني يوصلوه
وإنت جنابك عشت تحلم بالنجوم
إوعاك تفكّر يعني أو تحلم في يوم
عِشت الحياة بنية صافية وقلب طيب
متخيّل إن كل الناس بيبقوا طيبين
شُفت الحقيقة وكنت ليه دايماً تكدّب
مش أي ناس تشوفها يبقوا مُخلصين
إوعاك تآمن تاني مرة في يوم لحد
وإن حاولوا تاني يكلّموك إوعاك ترد
وإن جُم في وقت وإحتاجولك مرة تانية
إرفض بشدّة وإبني بينكم ألف سد
ياريت بلاش من تاني تبقى السلّمة
اللي أكيد بقى من خلالها هيطلعوا
ده فوق كتافك الخطاوي معلّمة
ومن خلالك يعني كِبروا ولمّعوا
من النهاردة يكون تعاملك برجولة
وإن اللي عدّى وفات إعتبره جولة أولى
وبلاش تكون كُمبارس وإبدأ من جديد
ومن النهاردة لازم تعيش دور البطولة
بقلمي عبدالحميد وهبه
ليست هناك تعليقات:
إرسال تعليق