في ليل كاحل
وسما صافية
ونجوم بتلالي في العتمة
وانا وحدي في عز الليل
مشتاق لأحضانك الدافية
اشد الضي م العتمة
ينورلي حياتي الكاتمة
اشتقت لكل شيئ فيكي
لريحة انفاسك العطرة
لحكاويكي غناويكي
لطيبة قلبك الزايدة
لنظرة عين تبربشلي
يا ام العيون سما صافية. .
للمسة ايد تدوبني
والأيد التانية تحضني
واهمس لك وتحكيلي
وأنور لك قناديلي
وأشوف في عيونك الجنة
واتهني واتمني
تعود ليالينا الحلوة
مين قال الموت. بيفرق
وبيشرق وبيغرب
حبيبتي السمرة ويايا
ليلاتي بتغمزلي تشاورلي
تكلمني تطمني وتحضني
وبتقول حبيبي لقانا في الجنة
وانا وكل اللي جوايا بندعيك
حبيبتي تكوني في الجنة
كنتي وما زلتي أغلي الناس
ياسمرة يا ام العيون السود
انا عايش علي الذكري
وطيفك جنبي ليلاتي
ينورلي كل حياتي
ويشد النور من العتمة
بقلم
احمد محمود
من ديوان سكة العاشقين
ليست هناك تعليقات:
إرسال تعليق