.........................................
إجا رمضان قلناله أهلا وسهلا
ياشهر الصوم الليالي فيك بتحلا
جبنا الأضواء علقناها بشرفتنا
رفعنا الزينات صارت حارتنا أحلى
.......................
يا شهر الصوم أجواءك روحانيه
صلاة وصوم صلة رحم وأهليه
فيك الزكاة للفقرا أحلى هديه
ووجبة إفطار نقدمها مجانيه
........................
منتلو القرآن ومنتدبر آياته
وفرض الصلاة منصليه بأوقاته
وحتى اللسان منصونه من زلاته
ومندعو الرب حتى نكسب مرضاته
.........................
ولمسحر ما أحلى أناشيده
بيجي كل يوم حامل الطبله بإيده
بيزور الحي بيصحينا بإنشاده
من القلب بقول الله من عنده يزيده
...........................
يا شهر الصوم شو بتزيد بفرحتنا
بتذكر دوم كيف كنا بحارتنا
نبعت سكبات للأهل والأحبا
والحلويات نصنعها مع جارتنا
........................
وهلأ لبيوت صارت شقق وطوابق
وبعدي عم حن لهالزمان السابق
وقت لكنا نجتمع بحارتنا
سهره وضحكات والفرح فيها عابق
................................................
ملك محمود الأصفر
بقلمي
ليست هناك تعليقات:
إرسال تعليق