باين عليها من دنيا تانية
مش من هنا
ده جمال عنيها ياخدك في ثانية
ويلف بيك مليون سنة
دي طيبة
دمعة عنيها قُريِّبة
دي ملاك يا ناس وحنينة
لمسه ايديها
تاخدك لدنيا فرح وهنا
ورموش عنيها
عنك تحوش حزن وضنا
همسه سكوتها
يسمعها قلبي لحن وغنا
وإن غنى صوتها
بدوب يا ناس عشق ومنى
دي بدر عالي وبكل غالي متزينه
عقلك يغيب وماتلقاهوش
لو بس فكت شعرها
وهتلقى مين عنك يحوش
لو شفته ساب على ضهرها
دي طيف برئ وف كل شئ متمكنه
وإن جيت اقول على احلى عود
يعجز لساني ويضيع اوام مني الكلام
دي قوامها ناي والخصر عود
فرقة موسيقى وبتعزف يا ناس انغام
عامله هليله محلاها ليله مين قدنا
كل الكلام مهما يزيد
ما هييجي حاجه في سحرها
لو مش هانام وأقول واعيد
ما يكفّي نقطه ف بحرها
ده يدوب يكمّل فيها اصغر عينه
مش من هنا
بقلميُ/ خالد جمال ٢٦/٥/٢٠٢٥
ليست هناك تعليقات:
إرسال تعليق