مسكين
مسكين أنا ف غرام حبيبي
أصل الهوى
ياما فيه يا ناس مساكين
مهما الغرام
جه ف يوم علينا
سهر عنينا
تلقانا فيه ماسكين
بنداري شوقنا
والخوف مالينا
والقلب فيه سكاكين
عمر الغرام
ما كان ف يوم بخاطرنا
وأمرنا ولا حتى ليه مالكين
لو حتى ضاع فيه عمرنا
بنقول نصيب مكتوبلنا
لو كنا فيه هالكين
مسكين أنا والخوف طاويني
ودموعي ع الخدين
مسكين عشان عاشقاه عيوني
وعيونه ولا حاسين
خاصمت خلاص النوم جفوني
وينام ف غمضة عين
عايش ما بين حيرتي وظنوني
وحنين آسرني سنين
تايه كده والشوق كاويني
ماعرف واخدني لفين
نفسي أسرقه واداريه ف عيني
ماتشوفه نظرة عين
نفسي احضنه واخفيه ف وتيني
شريان من الشرايين
دانا كل يوم بحلم يجيني
يمسح دموع ف العين
وبخاف أصارحه لعنيه تجافيني
ويموت ف قلبي حنين
ويضيع ف لحظة غرام ماليني
والروح تعيشها أنين
لو كان كلامي هيزيد آلامي
لو من لقاكي هتحرميني
احسن لي أعيش مسكين
بقلمي/ خالد جمال ٢٨/٦/٢٠٢٥
ليست هناك تعليقات:
إرسال تعليق