بيان توضيحي
يمشي تعدي النسمة ف ريحي
واما بيمشي بتعصف ريحي
بلقى ف قربه سعادتي وفرحي
وإن يوم فاتني تزيد تباريحي
قلبي يلومني إزاي كده سبته
والروح تشتكي من تجريحي
أعمل إيه والبيه مش حاسس
لا بتلميحي ولا بتصريحي
يظهر فهمه يا ناس على قده
محتاج مني بيان توضيحي
أو محتاجة الكلمة أراعي
لو قلتها وضعي التشريحي
قبل ما اروحله بفكر واسرح
لو يرحم حيرتي وتنويحي
خايف أوي وكأني مرشح
وبقدِّم أوراق ترشيحي
أو لاعب ندهولي أروح
اتفقوا خلاص على تسريحي
عمر القلب ما عنه اتخلى
بعشقه من فجري لتراويحي
توهت معاه وصابتني العلة
عشت أساه ونسيت تفاريحي
شكله يا ناس بيا بيتسلى
قلبه اتعود على تسويحي
مش هيقوللي بحبك إلا
بعد وفاتي وجمب ضريحي
بيان توضيحي
بقلمي/ خالد جمال ٢٦/٦/٢٠٢٥
ليست هناك تعليقات:
إرسال تعليق