احذف
احذف صوري معاك يوم عيدك
امسح لمستي من على ايدك
هات أنفاس سكنت تنهيدك
رجع دم وسال ف وريدك
موت شوق ف العشق وليدك
صُم آذان عشقت تغريدك
اكسر ناي عاش ليك وبيعزف
احذف
مهما القلب بغدرك وصفَك
مش هيكون وفّاك أو نصفَك
مش هيشوف أبداً على وصفك
ياللي حرقت القلب بقصفك
ياللي رميت الروح بعواصفك
جاي دلوقتي تبوح بعواطفك
جاي وفاكرني هموت على عطفك
اوعى تفكر قلبي ف صفك
مهما تحاول تظهر ضعفك
مهما هتقسم ليه أو تحلف
مهما العين ف الكون هتشاهد
مش هاتشوف كده زيك جاحد
مش هتلاقي ف غدرك واحد
قلبي ف حبك مات واتشاهد
لسه بزيفك جاي بتجاهد
جاي تتمنى لقلبي تعاود
علشان تأسى عليه وتعاند
جاي بتقول على قلبك رافض
إنه بذنب الغير يتاخد
وانه ماخانشي ولو يوم واحد
جاي ف حكم أساك بتعارض
وبتطلب مني اجيب شاهد
وأنت قصادك قلبي بينزف
احذف
بقلمي/ خالد جمال ٤/٨/٢٠٢٥
ليست هناك تعليقات:
إرسال تعليق