خد عقلي مني
دوِّبني فيه
لحظة ما جمبه أنا عديت
أول ما عيني
وقعت عليه
أنا من جماله اتخضيت
وسألني قلبي
مالك فيه إيه
على قلبي حتى مارديت
دانا من حلاوته
وجمال عنيه
من نظرة ليه اتشديت
ووقفت عيني
تتملى فيه
بالدنيا ديه ماحسيت
ده خبطني رمش
جاب أجَلي بيه
دانا من جماله اتهديت
والكون ده كله
مش سامعه ليه
باين عليا اطرشيت
زي امَّا اكون
سكران يا بيه
أو بنج بيه اترشيت
وف عز طوبه
راح بردي بيه
مانا لما شفته اتدفيت
حسيت بحضنه
بدَّارى فيه
وبرمش عينه اتغطيت
حس بغرامي
وهيامي بيه
وبصّ زي ما بصيت
مسّت عليا
نظرة عنيه
برموش عنيا انا رديت
ولقيت ايديا
حضنت ايديه
وف ثانية واحدة أنا حنيت
وسألني عني
قاللي اسمك إيه
مالقتش رد أصلى نسيت
نساني اسمي
احساسي بيه
أول ما شفته أنا طبيت
خد قلبي مني
راح فين وسابني
دانا ياما ليه اتمنيت
بقى كل أملي
بعد أما فاتني
حد يروَّحني على البيت
أتاريه كمان
نساني سكني
ده كله لما اتخضيت
بقلمي/ خالد جمال ١٩/٩/٢٠٢٥
ليست هناك تعليقات:
إرسال تعليق