قلب دايب م الهوى
خلصان سهر
للجرح عُرضة
لا ليه شاسيه
ولا حتى فيه ريحة الباور
وعاوز له بورده
بيميل أوام بيدوب هوا
ويقول قدر
من نظرة واحدة
ف الشوق ليالي وف الغرام
ياما ضاع هدر
عشق ومودة
ياما شاف جمال اتشد ليه
وبيه انبهر
ياما فات وعدى
عشقان دلع هيمان كمان
يعشق قمر
وبينشغل من كلمة واحدة
ما يهمهوش لا زمان مضى
أو طال سفر
ولا عمر عدى
ده كأنه مولود النهارده
اعمله إيه ماهو طبع فيه
يهوى الخطر
ده ضعيف قوي
ادام براءة أي وردة
ياما خانوا فيه مالقاش دوا
وكتير غدر
مجنون كده عشق ومواعدة
لا عمره يوم سلَّم وتاب
لو شعره شاب
او شاف كِبَر
لو كان ف عمره دقيقة واحدة
هيحب برضه
مايهموش لو مين يعارضه
أو إيه حصل
لو جوه منه حديده صدّى
قلب خردة
بقلمي/ خالد جمال ٢/٩/٢٠٢٥
ليست هناك تعليقات:
إرسال تعليق