يا حبيبي يا عمري يا ضي العين
ياللي الأشواق ليك وثابة
أشواق ملكاني وساكنة وتين
ملهاش تعداد ولا حسّابة
والروح لو قالت شوق ملايين
هيقولوا عليها دي كدابة
أشواق يا حبيبي شمال ويمين
خرجت عن طوعي ومتسابة
ده كبير وصغير بيك هايمين
بيشاوروا عليك بالسبابة
دانا قلبي وعقلي معاك دايببن
والروح ف هواك عاشقة صبابة
بحلم لو تعطف يوم وتلين
وتميل يا جميل داحنا غلابة
يا آسرني ف قصر عنيك الاتنين
من غير حراس ولا بوابة
يا ساحرني ومالك قلبي سنين
ومحيت بهواك كل كآبة
مابقولش هواك ده واخدني لفين
ولا بطلب رد ولا اجابة
دانا عمري معاك بيزيد نوبتين
والروح من بعدك غرابة
دانا جمبك ببقى ف حصن حصين
وإن سابني هواك هبقى ف غابة
ما تحن يا روحي على المسكين
يا بو قلب برئ كله طيابة
بقلمي/ خالد جمال ٢٣/١٠/٢٠٢٥
ليست هناك تعليقات:
إرسال تعليق