ياللي إنت هويتني عشان ثروة
كان أمَلك م التعلب فروة
الحب ما يعرفشي الأطماع
ولا عمره ما كان بيعه وشروة
ياللي إنت عشقت عشان تِغنى
فكرت الشوق رقص ومغنى
الحب يجيب المال لو ضاع
والمال من غير حب بيفنى
ياللي إنت هواك واخده تجارة
وبتمن الشوق تبني عمارة
ماحسبتش لو هوى بيك للقاع
زي ما فيه مكسب فيه خسارة
بالمال ف جمالك بتقدَّر
وبياخده اللي بيدفع أكتر
وبتحلم كل ما فيك يتباع
أحلم كان غيرك يابني اشطر
كان غرضك من عشقك تِعلى
بالزيف والغش معاك تحلى
عيِّشت الروح وياك ف خداع
والقلب وعدته وبيه تخلى
ده جمالك مهما إن دام زايل
وف لحظة هتلقى الحال مايل
أول ما الحسن يقول يا وداع
ع الشوق والحب هتتحايل
بقلمي/ خالد جمال ٢٧/١١/٢٠٢٥
ليست هناك تعليقات:
إرسال تعليق