جرب كده تبعد عن قلبي
جرب تنسى غرامي وحبي
واتحداك لو تنسى هواك
أصل خطاك مرساها ف دربي
جرب عن أشواقي تتوب
تنكر وعد عليك مكتوب
مهما جفاك ع الشوق أساك
برضه هترجع ليه مغلوب
جرب ليلة ما تسمع صوتي
وأنا ف هواك هستحلى سكوتي
هما يومين اتنين والقاك
جاي بتشتكي من جبروتي
جرب لحظة ماقولشي بريدك
أو مراسيلي تتوه ف بريدك
هتقوللي إن بعادي هلاك
رجع دمي يسيل ف وريدك
جرب ايدي ما تلمس ايدك
ولا يشتاق لوريدها وريدك
تلقى النار جواك كوياك
والأشواق هتئيد تنهيدك
فكرك عينك تعشق غيري
أو جفنها هيبص لغيري
أصل حجبت عليها النور
يبقى ازاي هتشوف من غيري
مش علشان قلبك مأسور
أو علشان قلبي انا مغرور
دا حنا اتنين الروح فينا واحدة
لو تكسرها تعيش مكسور
قرب مني يا عمري وقرب
من غير حضني تعيش متغرب
دانت غرامي ساكن جواك
لو هتشرق أو هتغرب
جرب
بقلمي/ خالد جمال ٨/١١/٢٠٢٥
ليست هناك تعليقات:
إرسال تعليق