ليه لما بشوفك وبقابلك
ليه لما الروح بتقربلك
بشعر وكأني ملكت الكون
والروح بتغني ويعلى التون
بتفوت أحزانها وتهربلك
ليه لما ايديك تلمس ايدي
ووريدك يهمس لوريدي
بسمعه بيقول ف هواك أشعار
ويميل على طبلة ورق وطار
ويقوللي لقاك فرحي وعيدي
ليه لما عنيك تحضن عيني
فيه سر غريب بينها وبيني
وإن قلت يا نني أنا عقلي احتار
بيقوللي الهوى ياما فيه أسرار
كان نفسي أحكيلك على عيني
ليه لما أنا بسمع تنهيدك
م العشق اللي انسال ف وريدك
بتئيد جوايا يا عمري النار
نار شوقي ف قلبي جحيم ودَّار
بتقولك عاشقاك وبريدك
أسئلة مالهاش أي إجابة
غير إن الروح فيك دوّابة
غير إني حبيبي بفكر فيك
ووهبت الروح والقلب إليك
إن الأشواق ليك غلابة
دانا عمري ابتدى بس ف قربك
يوم ما صارحتني يابني بحبك
دانا روحي بتتروي من نبعك
والقلب خلاص خد على طبعك
بيدق عشان يسعد قلبك
بقلمي/ خالد جمال ٦/١١/٢٠٢٥
ليست هناك تعليقات:
إرسال تعليق