حين تختبئ الحقيقة خلف وجوه الناس بقلم نشأت البسيوني

حين تختبئ الحقيقة خلف وجوه الناس

بقلم/نشأت البسيوني 

في كل طريق بنمشيه بنقابل وجوه كتير اشكالها تختلف بس جواها نفس الصراع القديم صراع الإنسان مع خوفه ومع ضعفه ومع اللحظات اللي بيعافر فيها علشان يفضل واقف مهما اتكسرت جواه حاجات محدش شافها ولا حس بيها يمكن أكتر حاجة بنكتشفها وإحنا ماشيين وسط الزحمة إن الحقيقة مش دايما بتبان وإن الراحة مش دايمًا عند اكتر الناس اللي صوتها عالي ساعات بنلاقي 

أعمق الوجع مستخبي تحت ضحكة هادية وساعات بنلاقي أقوى الشخصيات كانت ليلتها قبل ما تخرج من بيتها منهارة بس وقفت ورتبت نفسها وقررت تكمل الدنيا مش هينة ولا بسيطة ولو حد قال غير كده يبقى بيجامل الحياة بتمتحن الكل الكبير والصغير اللي فاهم واللي تايه واللي شايف الدنيا ملعبه واللي مش قادر يخطو خطوة قدام ومع ده كله الإنسان بيكمل لأنه مجبر يواجه مش مخير 

واللي بيفضل دايما ثابت وسط العاصفة هو اللي قدر يفهم إن الوجع مش نهاية وإن الوحدة مش وصمة وإن الفشل جزء من المعركة مش كل الحكاية في لحظات كتير بنصدق إن قوتنا في إننا نقف لوحدنا بس الحقيقة إن القوة الحقيقية في إننا مانستسلمش للألم اللي جوا القلب وفي إننا نفهم إن اتنين ماشين جنب بعض ممكن ينقذوا بعض بدون ما ينطقوا كلمة واحدة كل واحد شايل همومه 

بس مجرد وجودهم جنب بعض يدي روحهم طمأنينة غريبة كأن الدنيا لسه بتقول فيه أمل حتى لو الحلم أتأخر والأجمل إن مع الوقت بنكتشف إن اللي بيبان على الوش مش هو اللي جوا وإن الإنسان مهما حاول يخبي حزنه صوته بيتهز وعيونه بتكشفه وخطواته بتتباطأ بدون ما يحس وإن اللي فاهم الحياة مش اللي عاش السهل لكن اللي وقف قدام المر وخرج منه بشيء من الحكمة 

وشيء من الهدوء وشيء من الإصرار على إنه يكمل حتى لو لوحده

 الحكاية البشر كلها بتدور على نفس الحاجة لحظة راحة حضن صادق كلمة تطمنهم إنهم ماشيين صح حتى لو تعبوا وإن الأيام اللي وجعتهم مش هتفضل مفتوحة على نفس الوجع للآخر لأن الشمس مهما غابت لازم ترجع تطلع من جديد علشان تقول للكل إن الظلام عمره ما كان نهاية الطريق وإن الحقيقة مهما استخبت هتظهر وقت ما لازم تظهر