عاشت فيه.. وعاش فيها
وكانت ليه.. وكان ليها..
وكان عايش بيتامل
جمال الدنيا في عينيها
وليل السحر في رموشها
حنان الحب في ايديها
وشافها حلم.. وسعاده
وارض عفيه.. ولاده..
وانفاسها عبير الورد وزياده
وشافها ضل صفصافه..
شعورها ليل.. وهفهافه..
وشاف فيها حنان امه..
وعاش الحلم ولا همه..
وعاش يحلم بليل واعد..
اتارى الفرقه بتباعد..
وبتفرق ايادينا..
وليل الغربه ينادينا
ويبعدنا.. عن الجنه
كان حرام في بحر الحب نتهني؟؟
....... ..........
تمر شهور.. وجت ايام
لمح في عيونها نظرة غدر..
مش فيها..
شافت حبه في عيونه
وشاف الغدر في عينيها
وعاش ايام ولياليها..
يخاف ع الحلم يتبدد
يخاف ع الجرح يتجدد
دا كان نفسه..
يكون الخير في ايامها
يكون النور في لياليها
ولو تتعب تنام في القلب.. مطرحها
وجوه العين.. يدفيها
...... .........
وشاف الغدر في عينيها
ما عاد فيها جمال الدنيا ونعيمها..
ماعاد فيها حنان امه..
حضن حلمه.. وراح ضمه
وساب الحلم يتحطم..
وداس علي حلمه ولا همه
وشاف غيرها.. وخد غيرها
تشيل م القلب طول همه
وعاش ايامه يتعذب.. ويتالم
مابين حبه.. وبين الجرح
..... ..........
انا باحكي عن اللي احتار
وباحكي لكم..
ونفسي في نور قناديلكم
وشربة ميه من نيلكم..
انا من جيل ماهوش جيلكم
عاش بالحلم يتاثر..
وشاف الحلم يتكسر..
صحيت م الحلم متأخّر
وقالولي.. انا من جيل
ماهوش جيلك..
ومش من حقي اناديلك
ولكن حقي اتعذب.. ولا اسأل ليه
ومش من حقي اني احلم
ببكره الجي..
ولا اشتاق شعاع الضي..
ومش من حقي حتي اخاف
علي ايامي لتعدى..
ما انا هو اللي بحكي عليه
انا هو اللي عاش بالحلم متاثر
وساب الحلم يتكسر..
وعاش ايامه يبكي عليه
انا هو.. انا هو..
انا المجروح.. وباحكي عليه.
......... ........
شعر/نصر سيد بدر طلحه.. القاهره
@إشارة
ليست هناك تعليقات:
إرسال تعليق