بقلم/نشأت البسيوني
حين يدق القلب بعقله مش بعاطفته بيبدأ الإنسان يشوف الحياة من زاوية عمره ما اتخيلها زاوية واضحة مافيهاش تبرير لحد ما يستحقش ومافيهاش تضحية بتتاخد كأنها حق واجب ومافيهاش مشاعر بتتهدر عند أبواب مقفولة أو ناس وجودهم زي غيابهم لأن في لحظة معينة العمر بياخدك غصب عنك لدروس أنت ماكنتش هتفهمها غير لما تتوجع الوجع اللي يكبرك مش الوجع اللي يكسر
روحك وفي كل مرة بنبص فيها ورا بنفهم إن كل هزة قلب وكل خيبة أمل وكل حد ساب علامة مش لطيفة في حياتنا كان بيدفعنا خطوة ناحية نفسنا خطوة ناحية فهم أكبر لقيمتنا لأن اللي اتاخد مننا مكانش خير لينا واللي مشي من حياتنا كان لازم يمشي من بدري أوي بس إحنا كنا معميين بعاطفتنا ومصدقين إن كل الناس زينا نقية وصادقة وبتدي من قلبها من غير حساب ومع مرور الأيام
بنكتشف إن الطيبة من غير حدود بتتحول لعبء وإن العطاء من غير مقابل بيستهلك الروح وإن قلبك لو ظل ماشي بالعاطفة بس هيفضل يتألم ويتعب لأن مافي حد بيحافظ على قلبك قدّك ومافي حد هيوقف وجعك غيرك ولو فضلت تسامح وتبرر وتدي فرص زيادة عن اللزوم هتخسر عمرك قبل ما تخسر الناس اللي ما تستحقوش ويوم ييجي تلاقي نفسك واقف قدام مرايتك بتقول
خلاص كفاية كفاية من الناس اللي وجودهم وجع وسكاتهم وجع واهتمامهم وقت ما يحبوا بس كفاية من علاقات مش متوازنة ومش عادلة ومش فيها احترام لنفسك ولا لمشاعرك كفاية من البيبان اللي بقالها سنين مقفولة وإحنا لسه بنخبط عليها وإحنا عارفين إن مفيش حد هيفتح وإن مفيش جديد هيجي غير نفس الوجع والهدوء اللي بنيجي بعد قرار زي ده بيكون مش ضعف ولا
انسحاب ده شجاعة إنسان تعب من الفوضى وتعلم إن السلام أهم من أي علاقة وتعلم إن البعد رحمة أوقات أكتر من القرب وتعلم إن اللي مش قادر يفهمك مش قادر يحبك واللي مش قادر يقلل تعبك عمره ما هيزود راحتك واللي ماحسّش بيك في وجعك عمره ما هيعرف قيمتك في حضورك ولما القلب يدق بعقله يبقى القلب ده نضج واتقوى وعرف إن الحياة مش معركة لإرضاء حد الحياة رحلة
محتاجة اختيار مش اندفاع محتاجة عقل يحمي مشاعر مش مشاعر تضيع عقل محتاجة إنك تختار اللي يشيل معاك ولا يرمي عليك اللي يقويك ولا ياخد قوتك اللي يرفع قدرك ولا يقلل منك اللي يديك أمان مش قلق وحيرة وفي نهاية الطريق بنفهم إن سلامنا أغلى من أي علاقة وإن راحتنا أهم من أي كلام وإن عمرنا مش مساحة مفتوحة لأي حد يدخل وقت ما يحب ويخرج وقت ما
يحب وإن القيمة الحقيقية إنك تحافظ على نفسك حتى لو خسرت ناس كتير لأن اللي راح ماكنش جزء حقيقي من الرحلة واللي بقى هو اللي يستاهل يبقى جوه حياتك وهنا بس نعرف إن أجمل خطوة خدناها هي اليوم اللي قلبنا دق فيه بعقله مش بعاطفته لأن اللحظة دي هي بداية حياة مختلفة حياة فيها احترام لنفسنا وتقدير لوجعنا ووعي بقيمتنا وعهد جديد مع روحنا إن اللي يؤذينا مش هيدخل تاني وإن اللي يستخف بينا مش هيقعد لحظة زيادة وإن اللي ما يشيلناش مش هنحمله فوق طاقته ولا فوق طاقتنا
ليست هناك تعليقات:
إرسال تعليق