ممكن لو تسمح تيجي جمبي
هات وِدنك حُطَّها على قلبي
واسمع دقاته تقولك إيه
هتقولك دوبت أنا من حبي
ممكن لو تسمح تيجي ريحي
وتكونلي سعادتي وتفاريحي
دانا بنسى معاك كل آلامي
بنسى جراح قلبي وتباريحي
ممكن لو تسمح تيجي جاري
ياللي انت بحبك ولا داري
دانا من غيرك يا حبيبي شريد
والشوق ف هواك سكني وداري
ممكن لو تسمح تيجي يمي
ياللي انت هواك شطي ويمي
مانا أصلي بشوف الكون بعنيك
وان تبعد بمشي أنا متغمي
ممكن لو تسمح تيجي حدي
وتحط ايديك كده على خدي
ماهو كفك يابني كأنه حرير
وبلمسة أنا بلقى الكون وردي
ممكن لو تسمح تيجي عندي
وتصون ف الشوق وياك وعدي
دانا حبي مالوش ف الكون ده مثيل
ومحال انسان يهواك قدي
كل اللي أنا قلته ده م الآخر
إن الروح جايبة معاك آخر
لو جمبي هتحيا العمر معاك
وتموت لو عنها هتتاخر
شوفي قلت الكلمة بكام صورة
عامية وفصحى يا سنيورة
لسه بتتقال أو مهجورة
ف الريف شرقية ومنصورة
وف قبلي مراغة وبهجورة
مش طالب تختار غير واحدة
ترحمني يا عمري من الوِحدة
دانا روحي ف حبك مأسورة
بقلمي/ خالد جمال ٢٢/١٢/٢٠٢٥
ليست هناك تعليقات:
إرسال تعليق