حين يتغير شكل الحلم.بقلم نشأت البسيوني

 حين يتغير شكل الحلم وتفضل الروح ثابتة على حقيقتها

بقلم/ نشأت البسيوني 

في لحظة ما من العمر بنكتشف ان الاحلام اللي كنا شايلينها جوا قلوبنا سنين ما كانتش كلها لينا وان جزء كبير منها كان مجرد صورة احنا رسمنها بعناد مش بقناعة وان الطريق اللي كنا ماشيين فيه واحنا فاكرين انه خلاص هو ده مصيرنا اتضح انه مجرد فصل من رواية لسه ما اتكتبش فيها الا العنوان الاول وان الروح مهما اتغير حوالينها كل شيء بتفضل ثابتة على حقيقتها حتى لو كل 

حاجة اتبدلت وبنلاقي نفسنا فاهمين ان مش كل حاجة اتمنيناها كانت هتسعدنا وان مش كل حد تمسكنا بيه كان مناسب لوجودنا وان اللي ضاع ما ضاعش صدفة واللي اتأخر ما اتأخرش ظلم واللي راح ما راحش كده وخلاص وان الحياة كانت بترتب لنا محطات معينة علشان نفهم نقف امتى ونمشي امتى ونسامح امتى ونتخلى امتى ومع كل لحظة وعي نتأكد ان القلب لما يتخنق مش محتاج 

كلام قد ما محتاج هدوء وان الروح لما تتعب مش محتاجة ناس كتير قد ما محتاجة مسافة ومسافة واسعة كمان مسافة نعرف فيها نرجع نسمع صوت نفسنا اللي ضاع وسط الضوضاء وصوت اللي كانوا حوالينا وما كانوش قريبين مننا بصدق حتى لو المسافة بينهم وبين قلبنا كانت قصيرة ومع الأيام نتعلم ان الرزق مش بس فلوس الرزق راحة الرزق هدوء الرزق علاقات خفيفة على القلب وناس ما 

يعرفوش يوجعوا حتى لو ما عرفوش يساعدوا وان اكبر نعمة ربنا يكرم بيها إنسان هي ان يشيل من طريقه ناس كانت هتكسره اكتر ما هتبنيه ويبعد عنه طرق شكلها حلو وجواها ضلمة وبنحس ان اللي اتغير جوانا ماكانش ضعف ولا تعب اللي اتغير كان النضج اللي جه بعد اختبارات كتير ماحدش يعرف قيمتها غير اللي عاشها وان القلب اللي وجع مليون مرة بقى اقوى من الاول بكتير وبقى يعرف 

يختار ويعرف يرفض ويعرف يحب نفسه من غير ما يستنى حد يعمله قيمة ولما نبص حوالينا نلاقي ان الدنيا مش بتتقاس بالناس الكتير اللي حوالينا الدنيا بتتقاس بالراحة اللي جوه صدرنا والسكينة اللي نحسها واحنا سرحانين لوحدنا والضحكة اللي تطلع بصدق من غير ما نفكر مين هيسمعها ولا هتفكر مين وبنوصل للحظة معينة نعرف فيها ان السعادة مش محتاجة جمهور ولا 

محتاجة شهود السعادة محتاجة صدق محتاجة لحظة نقول فيها اخيرا فهمت اخيرا عرفت انا كنت رايح فين وكنت ضايع ليه وكنت محتاج ايه وبعد كل ده ندرك ان الحلم الحقيقي مش اللي بنجري وراه الحلم الحقيقي هو اللي ما يفارقش روحنا حتى لو اتغير شكله الف مرة هو اللي يكبر جوانا مش حوالينا هو اللي يثبت مكانه لما كل شيء يقع هو اللي يحافظ علينا قبل ما نحافظ عليه وفي اخر 

المشهد نعرف ان اللي جاي لسه اجمل وان اللي اتاخد مننا ماكانش لينا وان اللي هيوصلنا هو اللي هيكمل وان الروح اللي تعبت كتير هتيجي عليها لحظة ترتاح وهتعرف ساعتها ان كل اللي فات كان تجهيز للوقت اللي تستحق فيه نور اكتر وسلام اكتر وفرح ما يتقارنش بأي اللي ضاع والطريق لسه طويل بس المرة دي احنا جاهزين له بوعي جديد وقلب ما بقاش يتعلق بأي حد وروح اتعلمت تحب نفسها قبل الدنيا كلها