ثقل اللحظة اللي ما حدش يعرف يشيلها غيرك بقلم نشأت البسيوني

ثقل اللحظة اللي ما حدش يعرف يشيلها غيرك

بقلم/نشأت البسيوني 

في لحظات بتيجي على الإنسان تحس فيها إن صدرك ضاق على وسعه وإن الدنيا كلها صارت نقطة سودة محشورة في نص قلبك وإنك فجأة من غير أي مقدمات حسيت إنك مش قادر تكمل خطوة واحدة لقدام ولا قادر ترجع خطوة لورا وكأنك اتحبست في مكان ما حدش غيرك شايفه بس انت شايف تفاصيله كلها شايف الجدران اللي بتقرب عليك والصوت اللي بيدق في ودنك والفراغ اللي بيكبر 

حوالين روحك وبياكل منك كل يوم حتة صغيرة لحد ما تلاقي نفسك ما بقيتش عارف انت فين ولا عايز تروح فين ولا حتى بتدور على ايه في ناس بيبقى جرحها ظاهر ودمها على السطح وفي ناس جرحها أعمق من إنه يبان جرح ساكن تحت الجلد ما بيتشافش بس بيكوي كل دقيقة وبيقطع النفس من غير ما يلمس الهواء وفي النوع التاني ده بيعرف الإنسان يعني ايه الوجع من غير ما يكون 

فيه سبب واضح يعني ايه يبقى حواليك ناس كتير بس تحس انك لوحدك ومع إنك موجود في الحياة لكن مش جوه حياة حد ولو حد سأل عليك مجرد سؤال عابر تحسه مش واصل لحدودك مش داخل لأعماقك ولا حتى لامس الحتة اللي بتنزف جواك في لحظات بتعدي عليك وتعرف في ساعتها انك كبرت غصب عنك كبرت من غير ما تختار كبرت من وجع ما كانش المفروض تشيله لوحدك ولا 

كان المفروض يكون نصيبك من الدنيا بالشكل ده وفي لحظات تانية بتحس انك لو قلت كلمة واحدة هتقع كلمة واحدة هتهد الموقف كله كلمة واحدة هتكشف قد ايه انت اتكسرت وانت واقف واد ايه انت بتضحك وانت بتحارب واد ايه انت بتمثل القوة وظهر روحك بقى متشقق من كتر الحمل ودايماً السؤال اللي بيفضل يطاردك هو ليه محدش حس بيك وليه كل اللي حواليك بياخدوا من قوتك وما 

بيدوش ضهرك سند وليه كل اللي احتجت له في يوم سابك واقف في نص الطريق تقول للزمن استنى ومحدش بيستنى ومحدش بيسمعك ومحدش بيشوفك وانت بتنطفئ واحدة واحدة والغريب انك رغم كل ده مكمل وكأنك اتعلمت إن الوجع جزء من الرحلة وإن الوحدة اختبار للصبر وإن السكوت علاج وإن الدموع اللي بتنزل في الليل من غير صوت أصدق من ألف كلام بين النهار وإن اللي ربنا 

بيقدره على الإنسان ساعات بيكون أكبر من قدرته عشان يخلق منه شيء أقوى من اللي كان عليه قبل كده بس الحقيقة اللي محدش بيعرفها غيرك انك ما بقيتش نفس الشخص اللي كنت عليه وما بقيتش قادر ترجع لأولك وما بقيتش سهل عليك تثق في حد وما بقيتش تدي قلبك برخصه ولا تدي روحك لحد ياخدها ويمشي لأنك اتعلمت بطريقتك القاسية إن أكتر الناس اللي بتوجعك مش الغربه 

أكتر ناس بيوجعوك هم اللي كان مفروض يحموك وبرغم كل اللي حصل وبرغم كل اللي اتسحب منك وبرغم كل اللي اتاخد من روحك من غير إذن روحك لسه بتتنفس وجع بس بتتنفس وده في حد ذاته معجزة لأن اللي يعدي زي اللي عديته ويرجع واقف حتى لو واقف على آخر نفس يبقى شخص مش عادي يبقى شخص اتخلق من كسرة بس طلع منها صلب اتخلق من سقوط بس لسه بيقوم 

اتخلق من ظلام بس لسه بيدور على نور حتى لو النور ده نقطة صغيرة في آخر آخر الطريق

ويمكن ده نفسه سر قوتك

انك رغم ثقل اللحظة

لسه موجود

لسه هنا

لسه مكمل