بقلم/نشأت البسيوني
في لحظه معينه في العمر الواحد بيكتشف ان الطريق اللي ماشي فيه مش دايم للآخر ولا ثابت على حاله وان الخطوات اللي كان فاكرها مضمونه ممكن في ثانيه تتغير وتتبدل وتتشقلب وتاخده لمكان ما خطرش على باله ومع كل منعطف جديد بنفهم ان الدنيا ما بتمشيش برغبتنا لكنها بتمشي بين اللي نقدر نتحمله واللي لازم نتجاوزه غصب عننا حتى لو قلبنا مش جاهز ولا روحنا مستعده
وفي عز التعب بنفتكر اننا ضعاف لكن الحقيقة ان اللي وقفناه قبل كده كان كافي يهد جبال ومع ذلك عدينا ووقفنا وكملنا ولو رجعنا نفتكر هنلاقي ان اكتر اللحظات اللي وجعتنا هي نفسها اللحظات اللي عجنت فينا قوة ما كناش نعرف انها موجوده قوة بتخلينا نعرف نفرق بين اللي يستاهل واللي بيستنزف بين اللي وجوده يطمن واللي حضوره يقلق وبين اللي يبني جوانا شمس واللي يرسم
حوالينا ظل ما لهوش نهايه ومع كل يوم جديد بنفهم ان الانسان مش محتاج غير قلب صادق يعرف يقف جنبه حتى لو الناس كلها مشيت ومش محتاج غير حلم يفضل ماسك فيه حتى لو الدنيا نفسها قالت له مستحيل ومش محتاج غير نصيب مكتوب له ما يتأخرش ولا يتقدم غير في اللحظه اللي قدرها ربنا وفي آخر الليل لما الهدوء ينزل زي غطا على الروح بنلاقي نفسنا بنواجه حقيقتنا
من غير تجميل ومن غير خوف بنواجه التعب اللي خبيناه والدموع اللي ما قلناهاش والكسرة اللي محدش حس بيها غيرنا وبنتنفس ونعرف إن اللي جاي مش هيكون سهل بس كفايه إننا لسه واقفين وإن الروح لسه عندها حاجه تقولها وإن الحياه مهما اتعقدت هتفضل تمشي بين باب بيتقفل وباب بيتفتح وبين وجع بينتهي وامل بيبتدي من جديد
ليست هناك تعليقات:
إرسال تعليق