بقلم/نشأت البسيوني
في ناس ما حدش بيلاحظ التغيير اللي حصل جواهم ولا حد يعرف اللحظه اللي اتبدل فيها احساسهم ولا الطريق الطويل اللي مشوه لحد ما بقوا بالشكل ده هم ناس اتغيروا بصمت من غير ما يعملوا صوت من غير ما يشكوا ومن غير ما يلوموا حد الناس دي كانت زمان تتعلق بسرعه وتصدق بسرعه وتفتح ابوابها من غير ما تسأل ومتزعلش من حد وتسامح من قلبها لكن جت عليهم لحظه خلتهم
يعيدوا حساباتهم لحظه كسرتهم يمكن لحظه خذلان او غياب او كلمه ما كانوش مستعدين يسمعوها المهم انها لحظه غيرت فيهم حاجات كتير من بعدها بقوا اختياريين في الكلام اختياريين في المشاعر اختياريين في القرب اختياريين في مين يدخل حياتهم ومين يخرج وبقوا يعرفوا ان مش كل حد يستحق يسمع اللي جواهم ولا كل حد ينفع يشوف ضعفهم ولا كل حد يقدر قيمة
وجودهم اتعلموا ان اللي يحب بجد ما يوجعش وان اللي يخاف يخسرك ما يلعبش في المسافات وان اللي نيتهم صافية ما يغيبوش بلا سبب اتعلموا ان الاهتمام ما يطلبش وان الاحساس الحقيقي ما يتشرحش وان اللي يشك فيك من غير سبب هيشك فيك طول العمر الناس دي ما بقتش زي الاول ابتدت تحط حدود يمكن ما حد يفهمها لكن هي بالنسبالهم حماية للروح ابتدت تبعد من غير ما
تزعل وتنسحب من غير ما تشرح وتقطع العلاقة من غير ما تعمل مشهد كبير لانهم اكتشفوا ان الكلام ما ينفعش مع ناس ما تسمعش غير نفسها ورغم التغير اللي حصل جواهم لسه قلوبهم نظيفة لسه يحبوا بصدق لسه نيتهم طيبة بس بقت محمية اكتر من الاول بقت واعية اكتر من الاول بقت تختار صح وتفهم اسرع وما تنخدعش بسهولة واللي ما يعرفوش الناس ان التغيير ده مش قسوة هو
مجرد نضج نضج اتولد من الوجع ومن التجارب ومن السقوط اللي اتكرر كتير لحد ما وقفوا على رجلهم من جديد وعرفوا انهم يعملوا اللي يحميهم حتى لو الناس ما فهمتش الناس اللي اتغيرت جواها في صمت ما بقتش اقسى بالعكس بقت اهدى اقوى اوعى انضج وده مكسب ما حد يقدر يشوفه غير اللي مر بنفس الطريق
ليست هناك تعليقات:
إرسال تعليق