اوعى تشك ف حبي ثواني
دانا يا حبيبي بحبك موت
أو يوم تتنكر لحناني
لو سبتني من بعدك أموت
دانا علشانك فوت زماني
يوم ما خدتني عنيك السود
كنت غريق قبلك بيعاني
قلبي ف بحر الأسى بيموت
كت أمواجه محاصرة كياني
ناحية بقرش وناحية بحوت
بس غرامك جه ونجاني
يوم ما ناداني بعلو الصوت
حبك رد لقلبي أماني
بعد ما جلده الخوف بالسوط
بدد فيا جراح سكناني
عشت العمر معاك مبسوط
ضلل على قلبي وغطاني
ضلة عِنبه وشجرة توت
كان لي السيف وبدرعه حماني
من قسوة وظلم وجبروت
قلبك ده بيدق عشاني
دمك يجري في قلبي يفوت
سكنك جوه ما بين أحضاني
مش ف ديار ولا أى بيوت
وطنك فين ما بيبقى مكاني
عشقك ليا الزاد والقوت
زينتك لهفة قلبي يا غالي
لا بمرجان ولا حتى ياقوت
اوعى تفكر يوم تنساني
أو يوم يبقى هواك مشروط
دانت سحرت القلب ليالي
واتعلمته ف بوح وسكوت
اوعى يكون خيه عاملهالي
سحرك سحر هاروت وماروت
دول لو كانوا ملايكة يا غالي
اوعى تكون للقلب طاغوت
اوعى تسيبني وريح بالي
بُعدك ريح ف الروح بتشوط
بقلمي/ خالد جمال ٢٥/٣/٢٠٢٦
ليست هناك تعليقات:
إرسال تعليق