مش حرام عليك يا سيدنا تداريها
المشاعر وبي رقراق الخاطر
تنثر عطر الريدة عنوة وتكيدنا
وتعمل فيها ناسينا ومتناسينا
ومرة مستنكر تحن علينا
إلا في قلبك شايلو ريدنا
ليه... ليه الجفا ليه يا سيدنا
ما نحنا جيناك بي كل لهفة
سبقتنا تمرة الفؤاد جاياك بمحنة
جيناك والشوق باين في عينينا
شايلين قلوبنا بينات أيدينا
نحنا معاكا و بيكا جسرنا الحنان
وأجمل الآمال شيدناها وبنينا
وشوف.. شوف يا الحنين
لي حددت وين في مجرات
الألم والحسرة سرحته بينا
سبتنا آه وجرحته خاطرنا
إتجاهلتنا وقسيت علينا
أغرتك الدنيا وزائل جمالك
وأعمت قلبك إنك عزيز علينا
وبقيت من دون الناس
زي لقيت فينا البشينا
لا بيتحرك فيكا ساكن
ولا هزاك يتم قلوبنا
ولا دلاك درب المحنة
في لحظة عشم عشان تشوفنا
ولا مستحي تقول جفيتكم
عشان ظروفنا
وفيها إيه الدنيا ديه
ونحنا حافظين للوصية
أخلاصوا الود والوصال
سامحوا تهنوا
رغما عن عثرات الزمن والأسية
ومش حرام عليك يا سيدنا
عشان هويناك وناغمناك
وشنفنا فيك أجمل قصيدنا
ليه تنسانا وتجفاهو ريدنا
الحبوب الشبشاوي
الخرطوم السودان🇸🇩
(بشير التوم إبراهيم )
#الشبشاوي
ليست هناك تعليقات:
إرسال تعليق