أنا مش أنا
أنا النسخة اللي فاضلة مني
بعد ما اتكسرت ألف مرة
ولمّيت نفسي حتة حتة
من على رصيف الوجع
أنا الحلم اللي نام بدري
وصحي لقى الدنيا كبرت من غيره
أنا الضحكة اللي في الصورة
بس العين فيها بحر
حبيتك
مش عشانك انتي
عشان معاكي أنا كنت أنا
كنت بشوف الدنيا ألوان
مش أبيض واسود زي دلوقتي
كنتي الوطن
والغربة
والأمان
والخوف
كله في حضن واحد
ولما مشيتي
ماخدتيش قلبك بس
خدتي المعنى من كل حاجة
بقيت بشرب الماية طعمها غياب
بنام بس النوم بقى سهر
بضحك والضحكة بتستأذن من الدمعة
سألت نفسي طب وبعدين
قالتلي قوم
قُلتلها منين
قالت من قاعك
من تحت الرماد
من الحتة اللي لسه منبضتش
فهمت إن اللي بيوجعك بيعلمك
وإن اللي باعك بيخليك تشتري نفسك
وإن السكوت ساعات بيكون أغنية
وإن الدمعةغسيل للروح
أوعى تبيع قلبك عشان حد
أوعى ترخص حلمك عشان لحظة
أوعى تنسى إنك كنت يوم
سبب في فرحة حد
عيش حتى لو موجوع
كمّل حتى لو وحدك
وافتكر دايماً
إن الألف آه اللي في صدرك
هي هي الألف مرةد اللي هتقوم فيها... بقلمي اشرف محمد ضمراني
ليست هناك تعليقات:
إرسال تعليق