قلبي بيهواه والروح حاسة
ف العند معاه ده ما يتوصى
دانا جفني غطاه والعين فرشة
آجي ابوحله يصدرلي الطرشة
دانا حادق حلو وحاجة حِرشة
وكتير يحلموا من ايدي رشَّة
مش عارف ليه لملحتي قارشة
وغلبت مناهدة واحايل فيه
أوصفله الشوق مني بيسرح
لو اكون مخنوق فيا بيفرح
ف العند يسوق بكلام يجرح
ف ثواني بتوه مالاقيش مطرح
شجرة أحزاني هموم تطرح
مايقوللي غرامه ناويلي على ايه
فاض بيا خلاص وببات مغلوب
والعقل يا ناس مني انا مسلوب
قلت أسألها لو فيا عيوب
أتاريها وصلها ان انا العوب
بلاغيها لحد ما فيا تدوب
بوصل لمرادي وابكي قلوب
قلتلها خلاص دانا كنت هتوب
رفضت وقالتلي ده شيء مكتوب
كل اللي عملته ف يوم هلاقيه
أصل الأشواق دي سلف على دين
زي انا ماجرحت قلوب صافيين
وشبكت قمارى بنظرة عين
وسرحت بعقل بنات حلوين
كله بيطلع على قلبي أنين
بشرب من كأس كنت انا بسقيه
بستغرب ليه
بقلمي/ خالد جمال ٣/٨/٢٠٢٦
ليست هناك تعليقات:
إرسال تعليق