أنا يا هوى
أنا يا هوى بهواكا
وبتمنى لو أنساكا وأجفف
كل منابع الريدة
أكان ألقى من ريدتك شفاء
آه منو الفتق شقاف قلبي
نهل منها إرتوى وسرح بورداني
إتمدد جوه في عمق الحشا
وأنا يا هوى شفايا كان إنته
وإنته ما منك شفا
أدمنتو عشقك بقيت أتنفسك
وأوسدك بينات ضلوعي
وأسقيك الريد من وريدي وأزلزلك
سبحان من جمع قلوبنا وولفها
وريدتي ليك ما بقدر أوصفها
لو أوظف حنان عمري كله
لكن محال... محال
أقدر أوفيها حقها وأنصفها
إلا يا بحر الحنان
اللا منه مخافة ولا نجاة
ما رأيت في دنيتي
زولا في مقامك قدر
حطم كل المتاريس والأرصفة
ويتحدى ذاته ويغافلها
يتوسد شقاف قلبي عنوة
ويدفق حنية ويعاسلها
ويتناسل حنان.. حنان ويذوب
روحو في خوابي الأوردة
وبقيت أخاف عليك
من جور العيون وجرح الهوى
وأناغمك وا خوفي يا جارحني
في عمق الفؤاد لو تنساني
أو تنسى جرحا فتقته
لسه نازف ما إنطوى
لا من نار هواك جمر إبترد
ولا من عسيل سلافك إرتوى
وأنا يا هوى عليشان هواك
بتحدى كل الأصعدة
وا خوفي لو تتبدل عواطفك
تغبرني في لهب الشجون
وأفضل وحيد أذرف
دموع الحرقة راجي المنون
تاه مني زولا حصيف حنون
ما إفتكرتو في لحظة
يرضخ يخون شرع الهوى
خلاني أتجرع كاسات الأسى
ويتفتت قلبي يصبح حطام
أتقلى في رماد عصف الجوى
وأنا يا هوى بهواكا
وبتمنى لو أجفف منابع الريدة
أكان ألقى من ريدتك شفاء
أكان ألقى من ريدتك شفاء
الحبوب الشبشاوي
(بشير التوم إبراهيم)
للخرطوم السودان🇸🇩
#الشبساوي
ليست هناك تعليقات:
إرسال تعليق