يا قلبي انساه سنين وياه
وهوه بيأسى وبيجرح
عايش تهواه تقول الآه
وقلبه سامعها وبيفرح
دي لأ ماتجيش ماتتعبنيش
وسيب له الدنيا والمطرح
سايق في العند وليا الضد
لو اجمع هوه ليه بيطرح
ف نِفسي يسد لو ابني يهد
مراره ف قلبي نار تلفح
مشاعره جمود حجر جلمود
لا بيسامح ولا بيصفح
سنين بتفوت عايشها سكوت
وشجر الحزن فيك يطرح
تملي حزين ودمع العين
بيكوي الخد ويجرَّح
طواك نسيان ومش دريان
من الأحزان بتطوَّح
ليه كل يومين تجيلي منهار
ودمعك في العيون أنهار
ولا بتهدى في ليل ونهار
وجرحك نصل فيك يدبح
بتزرع شوق وتجني آلام
تآسي الليل وهوه ينام
عايش ف الغفلة والأوهام
وعمرك من ايديك يسرح
ما تنسى الدمعة والتنهيد
وتبدأ شوق جديد ف جديد
ده بكره أكيد جايب تغريد
ونوحة النبض هتروَّح
يجيلك يوم وتنسى هواه
يا قلبي انساه
بقلمي/ خالد جمال ٣/٩/٢٠٢٦
ليست هناك تعليقات:
إرسال تعليق