مَيِّل ،،،
ميِّل يا جميل ع الشوق ميِّل
أشواقي دي فوق ما هتتخيل
العين عاشقاك والروح شارياك
والعمر بلاك ليل بيليِّل
ميِّل ع القلب وغنيله
واشجيه بالحب ومواويله
اخضع لحنين واسكن ف وتين
والوعد معاك في العين شيله
ميِّل على روح سكنت حيك
على عين بتشوف بس بضيك
عين هامت بيك سهرت لياليك
ما شافتشي جمال ف الكون زيك
ميِّل ع الوجد وع الحيرة
على روح ف هواك عايشة أسيرة
وآهات مجروح ف الليل بتبوح
غير نجوى هواك مالهاش سيرة
ميِّل على شوقي وعلى وِدي
واحكي مع القلب وخد ودي
أشواق صابرين أيام وسنين
يحلموا والحلم معاك وردي
ميًل ع الهوى وعليه ضلِّل
واحميه لو هجر اليه اتسلل
وعده تلبيه وتحاجي عليه
ولا عمرك من شأنه تقلل
ميِّل
بقلمي/ خالد جمال ١٩/٩/٢٠٢٦
ليست هناك تعليقات:
إرسال تعليق