مش قدك يا جميل مش قدك
مش قد الورد اللي ف خدك
ولا قد لا عودك ولا قدك
مش قد السحر اللي ف يدك
ولا قد الحسن اللي مواعدك
مش قد التقل اللي ف ردك
ف هزارك يا جميل وف جدك
مش قد غيابك ولا بُعدك
ولا حمل خصامك ولا صدك
بس غرامك قده وقدك
مش قد الخطوة أما بتمشي
ولا شوق وياك سهر رمشي
مش قد جمال هام بعيونك
ولا أحلى كلام قايلاه جفونك
ولا لهفة إليك ما بترحمشي
مش قد الرمش أما يسلم
بيبوح بالعشق ويتكلم
ويقوللي اتعلم يا بني وشوف
وساعات بلمحه خجلان مكسوف
يشكي من الحيرة ويتظلم
لا انا قد العود مرسوم مزبوط
ولا أحلى قوام مانيكان وكيوت
مش قد الخصر أما يقسِّم
يندهلي برقة ويتبسم
وانا اقوله عنيا عليك هتموت
دي شفايفه يا ناس شهد مرمِّل
كاس خمرة بيسكر ويثمِّل
علشان ماهي نونو وننوسه
لو عدت بحدف كام بوسه
وبدوب ف جمالها أما اتأمل
مش قدك ولا هقدر اعارضك
وبقولك دوبت أنا في عرضك
وصيلي عنيك وتعالى عليك
واسمح للهوى يسري ف أرضك
مش قدك
بقلمي / خالد جمال ٤/١١/٢٠٢٦
ليست هناك تعليقات:
إرسال تعليق