الأستاذ موافى
..............
الأستاذ موافى راجل متعافى
وصحته مساعداه
لا أوزان ولا قوافى اشعار
وازجال يامحلاه
اللى يسمعه ياسعده ياهناه
أصل غاوى يلف على القهاوى
ويقول حكاوى مع الواد حسان
والواد قناوى
أما يهفوا الشوق يروح السوق يجيب بلاص مش معتق
أصل بيحب يحدق ورا كل حكاية يقولها من حكاياتو
بتاعت زمان
الشاطر بيومى أبن السلطان
مرجان
ده فارس وخيال وبتاع
نسوان
لما تدهور به الحال وبقى عاطل مش شغال
البانجو لحس دماغه قتل
جوز أمه عثمان
ويرص حجرين عالشيشه
مع رص الكلام
واللى على راسه ريشة
يقول تلت التلاته كام
ان قلت له ياعم بلاش فهلوى تلاقيه زعل واتلوى
وكمان يرزع موال عن الهوى
واللى م الغرام قلبه انكوى
ويشرب كوكتيل برسيم
على اناناس
يمشى يتمتم ويبرطم بأى كلام وخلاص
ويقفل راسه بقفل وترباس
ياعم الشعر له محطة مش
موقف ميكروباص
يقولك انا الأستاذ ومعايا كرنيه.
وياك أنت إيه
وكمان بحضر ندوات
مع الست كرنبه وابله فتكات
والأستاذ فلان دائم الأبداع
والاخطاء الإملائية يقولك ياعم خف عنى شوية بكتب بالعامية
بلاش تعمل ازمات بدون داع
والحروف الواقعة يقولك اشرب حاجه دافيه بالصحة والعافية
وابعد عن الحاجه الساقعة لتجيبلك صداع
معاه شوية سنيده وحبة زكيرة
ف سهرة ظريفه ولطيفه سعاد وسميرة
حشيش وبيرة ومزة وتهز هزة
مع احلى مزه رقص السكيرة
وحاجات كتيرة فيها افشات
ونكات
يحلفو مية طلاق انه أحسن
فنان على الاطلاق
ومافيش زيه لا فى الانحاء
ولا حتى فى الاموات
ودا كان كافى للأستاذ موافى
قوله عوافى على البهوات
بتوع الندوات والكافيهات
.........
بقلم.الشاعر
الأمير _محمود
ليست هناك تعليقات:
إرسال تعليق