كلاكيت تاني مرة
الى شهداء قطار الصعيد ( المرة الثانية ) الجمعة 26/3/2021
المشهد نهار خارجي
والموت بطل
بيعيد في نفس الدور
المكان نفس المكان
الملامح هيا هيا
والوشوش نفس الوشوش
والحكاية هيا حدوتة الوجع
اللي اتزرع جوا القلوب
مشهد بيتكرر
وفارد نفسه على كل البشر
عشان ساعة القدر
يعمى البصر يعمى الضمير
والناس تفاجأ بالنهاية المذهلة
وادي الجدع
رايح بيقطع تذكرة
مستني صفارة الأمان
تاخده لحبيبته اللي انكفت
طول النهار
تعمله في اللقمة وتجهز الهدمة
وتنشر فوق سطوح البيت
حلم الصبية و الصبي
عايزيني اوصف ايه
لا الحلم ينفع شرحه ولا ينفع
يكون للبيع
الحلم مرسوم بالغلط
في عيون بتهوا الموت على شريط
القلق ماشيين
الحلم سبوبة الغلابة الشقيانين
وجع الصبايا المجروحين
طعم الامل
في عيون ولادنا الحيرانين
الحلم حالة ماتتحكيش بين السطور
ولا يتوصف
في عيون مدوبها الأنين
الحلم شيء أجمل كتير
الحلم طير
احساس بياخدك
يخطفك من دنيتك
وف اي لحظة يقوم راميك
الحلم زحمة قلبك المقتول
في ليل السهرانين
الحلم تفسير الحياة والحالة
لما تودي فيك للمنتهى
وف لحظة عمرك انتهى
الحلم عشق مالوش بديل
ولا اي حاجة تعوضه
يكسر شراع خوفك ويبقالك دليل
بس ف نهاية كل حلم
حبة حاجات بتبوز الصورة وجمالها
الوهم يركب مركبك
يرميك بموجه ف ليل طويل
مين اللي قال ارسم وجع
مين اللي قال الموت جدع
مين اللي قال اوصف في حالة
ماتنتهيش
وملوعانا وعاملة الوان البدع
الصورة ابلغ م الكلام
يا مسطرين الشعر بحروف الدهب
وف سكة الأحزان على القضبان
بتتسرسب سنين التعبانين
الشبعانين ذل وتعب
الصورة ابلغ م الكلام
علشان نبطل نكدب الكدبة
نصدق نفسنا
ونسيب ورانا للزمن حواديت
ماليها الا العجب
يادي الكلام المستغل المستفز
المضطرب
يا لوعة المشتاق لحضن حبيبته
لما بتندهه
يادي الوجع من غربة الأوطان
ومن ذل الطلب
عايزيني أوصف ايه يا ناس
ومنين يجيب الوصف
احلامنا اللي ماتت
ومنين يجيب الوصف
ايامنا اللي فاتت
وازاي اسطر بين حروف قلمي
قصايد شعر يملاها الأمل
ايه العمل
وانا من زمان سايب لبكره الجاي
احساسي المخيف
الصورة ابلغ م الكلام
والارصفة اتحنت بدم ولادك الشرفا
والارض حبلى
بس أجهضها النزيف
مش عارف اكتب من زمان
حدوتة الشاطر حسن
ولا حتى في الموال ياسين وبهية
أغزل من حروف الشعر
حدوتة شجن
وازاي نرجع حلمنا لحضن الحياة
واحنا اللي بين الآهه والتانية
مية ألف آآآآآآآه
كلاكيت تالت مرة
رابع مرة
عاشر مرة
والمشهد في قلب التوهة يتكرر
وكومبارس المواقف زي ماهما
بين الصمت والفرجة
واخدنا الزيف
من كام سنة
نفس الحكاية المدهشة
والموت بطل
باصص وفارد ضحكته ف كل الطرق
حدوتة زي ما تبتدي
من غير حقيقة بتنتهي
وهلم جرا ف نفس ملكوت الحياة
كلاكيت يا اهل الله
عشان ننهي الوجع
نقفل فصول المهزلة والمسألة
الضحكة ترجع فوق وشوش الناس
وتحلم بالأمل
أرض المحبة اللي ارتوت من دمنا
نسقيها أحسن بالحياة والخير
وكفاية موت يا اهل الطريق
بقلم ياسين محمد
ليست هناك تعليقات:
إرسال تعليق