حتى السكوت بيئن
نفسه فى حبه كلام
ويشيل من على صدره
غشاوه الليام
مين اللى حبسك ياطير
وحبس معاك صوتك
مين اللى خانك واشترى
بالرخيص موتك
من قلب المدن الخرسا
سكاكين فوق اللسان
بتقطع الاحلام
اوقات يكون سكوتى كلام
ما تصحنيش وتصحى احلامى
خلينى نايم متغطى جمب النيام
عابر سبيل مش باقى منه
غير لسان مقطوع
على مركبه تايهه فيها الامل ممنوع
اوطان تسافر واوطان رافضه الرجوع
يا مركبه فاضيه ومروحه
زى الشمس اللى رايحه
وزادها شويه الم
حبه دموع مالحه
والجته مهلوكه ومملوكه
مش نافعه
زى الطعام الفاسد اللى
ريحته مش صالحه
فرمان الى وزير الكلام
بسم الشعوب الحره بسم الاوطان
بسم الحروف اللولى م الانحيل
بسم ايات المحبه اللى ف القران
بسم الليالى الخضرا بسم السنين
عاشقك انا بقلبى وعروقى
ولو حطو على قلبى ميت كمين
ولو رجولى فوق المشنقه
واحلامى خنقها الموج
والسكه زى خرم الابره ضيقه
بتدارى ليه عنى ياليل احزانك
شايفها بين عنيك
مكتوبه على بابك
وياعم ياسجان خلصنا من كل الحيتان
سيبو الطيور فوق السنابل
فكو كلابيش الغيطان
رجعو الفرحه لحضن الفقير
خلو القمر يرجع يبات سهران
نفسى اكون انسان جماد
نبات عايش ولو بنص لسان
الشاعر / رضا البوشى
ليست هناك تعليقات:
إرسال تعليق