حسرة أم
_____________😘😇🥰😇
ماتستهلوش
اللي مايشوفنيش دهب في عنيه
تراب تحت رجلي ماشوفهوش
ماتستهلوش من عيني دمعه
وانا اللي كنت لحياتكم شمعه
وماقدرتوش
ماتستهلوش
قضيت حياتي اراعيكم
وأخد من عمري وأديكم
واسعد قوي وانا بشوفكم
بتكبرو وافرح بيكم
وكبرتو خلاص ياولادي
ومهما عليكم انادي
واقول محتاجه وقفتكم
جنبي ومحتاجلكم
ماسمعتوش
ماتستهلوش
ياعيني علينا ربينا
وسهرنا الليل وراعينا
من وانتم لسه في بطني جنين
وانا بسقيكم من قلبي حنين
ياشجره راعيتها ورويتها
من قلبي وعمري سنين وسنين
وقلت بكره راح تكبر
وتحت ضلها اتغندر
ولما كبرتو ماضللتوش
ماتستهلوش
انا كنت ليكم بنيه مبنيه
طوبه رحمه طوبه حنيه
ماشوفتو يوم مني أسيه
ضحيت كتير علشانكم
وبقيت انا ليكو ضحيه
ليه ياولادي ليه قسوتكم
وفين راحت محبتكم
وانا اللي قلبي ليكو وطن
راح فين مكاني في قلوبكم
ولما احتاجكم مالقكوش
ماتستهلوش
_____________🥰😇😘😇 Ghazala Attia غزالة عطيه
ليست هناك تعليقات:
إرسال تعليق