سنة من عمري.
عبدالله رجب ابوعدنان
مطر وسحاب وغيوم
ونفس صابرة ع الهموم
ها تعب روحي ليه
لما الرزق بالعدل مقسوم
وفاكرينها شطارة
سنة عدت بحلوها و مرها
زي سنين عدت قبلها
يفيد بأيه لو حبيتها ولا كرهتها
واحنا عارفين إن الأيام غدارة
نفسي افرح والكون يفرح
من غير ألم ولا جرح
شمس الخير تفتح
ونور المحبة علينا تصبح
يا سنة جديدة ورينا أمارة
شوية برد على شوية غلا
وشوية ضحك ينسينا البكا
وادي ورقة سقطت ف الخلا
ولا يمكن عمري دالوقت ابتدى
واعبي الحظ ف شكارة
وصحاب ضمتهم السما
بدور ف كوم قش والفلا
يآرب لكل حبايبي السعد و الهنا
وندوس ع الوجع وتكون أحلا سنة
نتلم ونزرع الأرض سوسنة
ونبني بالحب مية مليون عمارة
ونعيش ف سلام
ونبعد عن جرح الكلام
وحالنا يصبح تمام التمام
وبلدي للعالم أعظم منارة
يا سنة مولية ها توحشينا
ياما وجعتينا وزعلتينا
اختك راح تكون زيك
ولا الخير يغطينا
ولا نزرع م الصبر مليون شجرة صبارة
ليست هناك تعليقات:
إرسال تعليق