عبدالله رجب ابوعدنان
ناولني النبوت يا عب هادي
خليني اكسر الوجع والألم
العوزة والبكا المرادي
على ميت على حرف الترعه اتردم
على غلا راكب تلابيب وطن
ومسخرة وتاتو ووهن
وانا اللي جلدي علشانها كفن
ادي هدومي وهمومي
وولاد الاكابر معروفين للزمن
لكن إحنا عدم
ناولني النبوت نفسي اكسر الواسطة
وشغل التلات ورقات والاوانطة
مين السبب إنها مش ع الخارطة
بعد ما كانت أول الأمم
ياة يا با سويلم
لسه الساقيه بتلف
لا الأرض رويت
ولا جراحنا بتخف
ولا من عيوبنا بنتعلم
عيش وملح
واكبس ع الجرح
وبير غويط اتفتح
وعرقنا بينقط دم
وخزين البيت خوف
وصبي ع الموضة ملهوف
وهم للغلابة موصوف
وكبرات البلد سلامه الشوف
وكلام حلو عسل ف سم
دي حكايه طويلة محتاجه دواوين
نزرع قمح ونتمرمغ ف الطين
ونرجع تاني أرض الطيبين
اللي بيسرق الفرحة ف عيون الغلابة
واللي رسم الحزن مش بشر لأ ديابة
هما اللي ع الدوار حارسين
وهما اللي باعو الغلة والطحين
وأول ناس تشيل العلم
ليست هناك تعليقات:
إرسال تعليق