الحقيقه لاجدال ولامفر
أيوه بكره يقولو مات
وإنتهى ومن سكات
والعزا هيكون ساعات
أخره يوم من غير بيات
أيوه بكره يغسلوك
ويكفنوك وهيحملوك
وفى الجنازه يودعوك
وللمقابر بعض منهم
يومها ييجو يوصلوك
ياكشى فاكر نفسك إيه
للأجل مانعلن حداد
أنت أخرك يعنى إيه
كام ساعه هيكون عزاك
فى اللى هيقول راح بهمه
كان مصدعنا بغمه
وفى اللى راح يحزن عليك
أصله عاش كان بيواسيك
وفى اللى راح يفرح بقلبه
فرحته دى شماته فيك
وبمجرد الوصول
والجميع ياخده الفضول
تنزل القبر وتودع
والدعاء مش راح يطول
والجميع يقفو فى صف
والعزا يمشى بدور
واللى واقف أيوه أبوك
جنبه خالك أو أخوك
كله راسم حزن قلبه
كله بيكفر فى ذنبه
والصحاب واقفين بعيد
حزنهم عمال يزيد
هو دا واقع حياتك
والكلام مفهوش جديد
والجميع يرجع وينسى
والقلوب الصافيه تأسى
والأهم من دا كله
إبنك اللى عشت ضله
كله مستغرب وجوده
كنت أبوه وكنت خله
أيوه مات
وإنتهى ومن الوجود
أيوه بكره هياكله دود
واللى فاكر نفسه شاب
يترمى فى حضن الجدود
أيوه مات
فى اللى راح يعرف بموتك
بكره راح يدعى بسكوت
والصراع اللى انت عامله
بكره يتبدل سكوت
أيوه مات
أيوا مات ومعاه همومه
بكره يتوارثو فى هدومه
والقلم راح يكسرو
ياكشى فاكر هيصونو
أخره راح يكتب نهايه
بنعى ينهى ١٠٠ حكايه
هى دى قصه وداعك
هى دى كل الحكايه
اللهم إرزقنا حسن الخاتمه
تحياتى /
مدحت لطفى عبدالعال
ليست هناك تعليقات:
إرسال تعليق