حبيت صبية
الشاعر / رضا البوشي
قلبي كاساتة كساها المر
والهم بايت على حلقي
والفقر فأر عمال بيعض
ولا ضحكة فايتة تبحلق لي
ويا مصر حبك زي الكيف
حلق في ودني يبرق لي
ولو هكون في حبك ضيف
طاب لية في بعدي بتحلوي
حبيت صبية
ضحكتها زي الشمس عفية
ومهرها ولا ميت موال
ومن العشا للمغربية
عشان اشوفها
اعدي بحور واطلع جبال
زاد الحنين مليون ريختر
في شارعنا قام ميت زلزال
قلبي الشقى قام بسلامتة
رسم صورتها على الخلخال
حبيت صبية
وسقف بيتها عامود ياسمين
وعفش بيتها
مرتبة متخيطة
بفتل الحنين
زحمة شوارع على بابها
وبين دراعاتها
كل البشر واقفين
موج البحار حتى المحار
على كتفها نايمين
وحضنها مراكب شمس
بتدفي كل البردانين
حبيت صبية
الجو حر وكل يوم
أحزان تبيض
والعمر عدي وفات الأربعين
والشتا فاتح بيبانه
ما يعرفوش ان الدفا
َمتخبي جوة الايدين
حبيت صبية
حبيت صبية زحمة شوارعها
ولا فيها شبر فاضي
ومجنناني ومغلباني
جعان و القلب راضي
ولما تفرد حضنها يطلع تلات اشبار
شبر يتفرق محبة ع المغرمين
وشبر للاغنيا وللمحتاجين
وفيه شبر فاضي مكتوب عليه
الطيبين
حبيت صبية
وكل ديب قدامها.
يرجع لاصلة ياناس كتكوت
مكتوبة في كتب التاريخ
في أول صفحة في الملكوت
والقطر لما يمر قصادها
بيقول مصر توت توت
متبغددة في العز
ولا عمرك يوم نشفتي
يا دايرة على كيفك
وان حتى جاكي الموت
بيهدي زي القطر ويقول
توت توت توت
حبيت صبية
جوة الصديري انا كنت لابسك
جوة الصديري
يا منورة لياقتي نضارتي وقميصي
يا نور جوة القلوب طافح
ع السمسميه غناها بحراوي وصعيدي
زادت مواجعي حتى مراكبي
ملاها الشوق
وكل ما اهرب من وشك بلقاكي
منحوتة في كل تفاصيلي
ياعود ريحان في كوبايتي
يا حمامة نايمة في شباكي
ده نا اللي شاربك في عصيري
حبيت صبية
ليست هناك تعليقات:
إرسال تعليق